Text: 1   M3/ Mittelpersisch



<*mʾny ...>
ʾmd  ʾn nwhzʾdg
ʿyg trkwmʾn ʾwd kwštyẖ
d(h.)r ʾwd ʾbzxyʾ ʿy pʾrsyg
ʾ[mwšt] bwd hym ° ʾwd šʾẖ
nʾn xwrdn bzm bwd ° ʾwš
dst ʾhnwnc ny šwst w:
ʾdyd hynd psʾnygʾn ʾwšʾn
gwpt kw mʾny ʾmd ʾwd pd
dr ʿysṯyd °° ʾwd šʾẖ ʾw
xwdʾwn pygʾm prysṯʾd kw
ʿyw zmʾn pʾy  ʾn xwd ʾw
ṯw ʾʾyʾn °° ʾwd xwdʾwn ʾbʾc
ʾw ʿyw kwstg ʿyg wyng nšsṯ
°°  šʾẖ dst šwsṯ °° cy
xwdyc ʾw nhcyhr prnpṯn bwd
°° ʾwd ʾc xwrn ʾwl ʾxysṯ
ʾwš ds[t] ʿyw ʾbr sgʾʾn
bʾnb(y)šn ʾbgnd °° ʾwd yk
ʾbr k(y)[r]dyr ʿy ʾrdwʾngʾ[n] ʾwd
prʾc [ʾw] xwdʾwn ʾmd °° [ʾwš]
[p]d sr (sx)wn ʾw xwdʾwn ʾwẖ
{gap? Sal.: [w:]} gwpt [kw] (m)ʾ (dr)[y]sṯ ʾwr °°
[ʾwš xwdʾw]n ʾbʾc gwfṯ kw

cym rʾy tyswm wynst °°°
ʾwd (š)ʾẖ gwft kwm swgnd xwrd
°° kwt pd ʿyn zmyg ny hyl[ʾ](ʾ)n
(rfṯ) °° ʾwš pd xyšm ʾw x[wdʾ]wn
ʾwẖ gwpṯ kw ʾyy pd cy
ʾbʾyšn hyd °°  ny ʾw kʾrycʾr
šwyd ʾwd ny nhcyhr
kwnyd °°  ʾwhʾy ʿyn bšyhkyẖ
rʾy ʾwd ʿy<n> drmʾn bwrdn rʾy
ʾbʾyšn hyd °° ʾwd ʿync ny
kwnyd °° ʾwš xwdʾwn pswx ʾwẖ
dʾd kw (mn) pd ʾšmʾẖ tyswc
ny wyns[t] °° (cym) myšg kyrbgyy
kyrd pd ʾšmʾẖ ʾwtʾn pd
ṯwhmgʾn °° ʾwd ws ʾwd pr(h)yd
bng ʿy ʾšmʾẖ kym dyw w:
drwxš ʾcyš b(ʾ) [bwr](d) °° ʾw[d]
ws bwd hynd °° k[ym] ʾc
wy(m)ʾryẖ ʾxyznʾd [h](y)nd °° w:
ws bwd hynd ky[m] tb
ʾwd rrz ʿy cnd (s)[ʾ]rg ʾcyš
ʾnʾpṯ °° ʾw[d *ws bwd] hynd
[k]y ʾw mrg md ʾwmy[šʾn •••] 
{text continued on lost page}